ខ្ញុំមិនដែលអានព្រះគម្ពីរទេ តើខ្ញុំគួរចាប់ផ្ដើមនៅត្រង់ណា?

«ជម្រាបសួរលោកគ្រូ ប្រសិនបើខ្ញុំមិនធ្លាប់ដែលអានព្រះគម្ពីរតែម្នាក់ឯងសោះ តើខ្ញុំគួរចាប់ផ្ដើមអាននៅក្នុងកណ្ឌមួយណា?» ខ្ញុំចង់និយាយលេងជាមួយនឹងអ្នកសួរសំណួរនេះខ្លាំងណាស់។ ដូច្នេះ ខ្ញុំសង្ឃឹមថា គាត់កំពុងតែអាន ឬក៏ស្ដាប់ការឆ្លើយតបនេះ។ តោះ! ចូរយើងចាប់ផ្ដើមពីចំណុចសូន្យ ដោយពិនិត្យមើលរូបភាពធំសិន ដែលការធ្វើដូចនោះនឹងជួយឲ្យងាយយល់ចម្លើយដ៏សាមញ្ញរបស់ខ្ញុំ។ ព្រះគម្ពីរគឺជា. . .

៣១ មីនា ២០២៤អានរយៈពេល ១១ នាទី

មើល២១១ដង

«ជម្រាបសួរលោកគ្រូ ប្រសិនបើខ្ញុំមិនធ្លាប់ដែលអានព្រះគម្ពីរតែម្នាក់ឯងសោះ តើខ្ញុំគួរចាប់ផ្ដើមអាននៅក្នុងកណ្ឌមួយណា?»

ខ្ញុំចង់និយាយលេងជាមួយនឹងអ្នកសួរសំណួរនេះខ្លាំងណាស់។ ដូច្នេះ ខ្ញុំសង្ឃឹមថា គាត់កំពុងតែអាន ឬក៏ស្ដាប់ការឆ្លើយតបនេះ។ តោះ! ចូរយើងចាប់ផ្ដើមពីចំណុចសូន្យ ដោយពិនិត្យមើលរូបភាពធំសិន ដែលការធ្វើដូចនោះនឹងជួយឲ្យងាយយល់ចម្លើយដ៏សាមញ្ញរបស់ខ្ញុំ។

ព្រះគម្ពីរគឺជា. . .

ព្រះគម្ពីរគឺជាការប្រមូលផ្ដុំ៦៦កណ្ឌខុសៗគ្នាចូលជាសៀវភៅមួយ។ កណ្ឌទាំងនោះត្រូវបានសរសេរឡើងដោយមនុស្សខុសៗគ្នា អស់រយៈពេល១៥០០ឆ្នាំ ដែលការនេះកាន់តែធ្វើឲ្យព្រះគម្ពីរកាន់តែអស្ចារ្យ ដោយសារកណ្ឌនីមួយៗមានភាពស៊ីគ្នា និងរួមគ្នាក្នុងដំណើរការសាច់រឿង។ ប៉ុន្តែ វាគឺជារឿងដ៏សំខាន់ណាស់ក្នុងការដែលយើងទទួលស្គាល់ថា មានអ្នកនិពន្ធជាច្រើននាក់—អ្នកនិពន្ធដែលជាមនុស្ស—មិនមែនតែម្នាក់នោះទេ។

ដូច្នេះ ៦៦កណ្ឌនេះ នៅក្នុងសៀវភៅតែមួយក្បាល ដែលយើងហៅថាព្រះគម្ពីរ មានប្រភេទអក្សរសាស្ត្រខុសៗគ្នា។ ខ្លះជាប្រវត្តិសាស្ត្រ ខ្លះជាកំណាព្យ ខ្លះជាទំនាយ ខ្លះជាសំបុត្រ។ល។—ដែលទាំងអស់មានរបៀបសរសេរខុសៗគ្នា។ ហើយយើងក៏បានចែកកណ្ឌទាំងនេះទៅជាពីរផ្នែក៖ ព្រះគម្ពីរសញ្ញាចាស់ និងព្រះគម្ពីរសញ្ញាថ្មី។ ពាក្យ «សញ្ញា» ក្នុងភាសាដើមមានន័យថា «ការឯកភាព» ឬក៏ «សេចក្ដីតាំងសញ្ញា» ទាក់ទងនឹងរបៀបដែលព្រះជាម្ចាស់បានធ្វើការជាមួយនឹងរាស្ត្ររបស់ទ្រង់។ ព្រះគម្ពីរសញ្ញាចាស់មានកណ្ឌដែលបានសរសេរឡើងមុនព្រះយេស៊ូវគ្រីស្ទយាងមកផែនដីនេះ ហើយព្រះគម្ពីរសញ្ញាថ្មី ( ឬក៏ «សេចក្ដីតាំងសញ្ញាថ្មី») មានកណ្ឌដែលបានសរសេរឡើងក្រោយព្រះយេស៊ូវគ្រីស្ទបានយាងមក។

ព្រះគម្ពីរសញ្ញាចាស់មានកណ្ឌដែលរៀបរាប់អំពីការត្រៀមទុកនៃការយាងមកផែនដីនេះរបស់ព្រះរាជបុត្រានៃព្រះ—ព្រះយេស៊ូវគ្រីស្ទ។ ហើយព្រះគម្ពីរសញ្ញាថ្មីគឺអំពីអ្វីដែលព្រះអង្គបានធ្វើថា ទ្រង់ជាអ្នកណា និងអំពីរបៀបដែលព្រះអង្គបង្កើតចលនាគ្រីស្ទបរិស័ទ ព្រមទាំងអំពីរបៀបដែលយើងគួររស់នៅ ក្នុងនាមជាគ្រីស្ទបរិស័ទ ទាក់ទងនឹងរាល់ចំណុចទាំងនោះ។ ព្រះគម្ពីរសញ្ញាចាស់មាន៣៩កណ្ឌ ហើយព្រះគម្ពីរសញ្ញាថ្មីមាន២៧កណ្ឌ។

សូមចាប់ផ្ដើមនៅចំណុចកណ្ដាល

ក្នុងបណ្ណាល័យដ៏ធំមួយនេះ ដែលព្រះជាម្ចាស់បានបណ្ដាលឲ្យតែងកណ្ឌដ៏ពិតទាំងនេះ តើលោកអ្នកគួរចាប់ផ្ដើមអាននៅត្រង់ណា? ចម្លើយរបស់ខ្ញុំគឺថា ដោយសារព្រះយេស៊ូវគឺជាតួអង្គចម្បងនៅក្នុងព្រះគម្ពីរ ហើយព្រះអង្គក៏ជាអង្គដែលពន្យល់នូវរាល់គ្រប់ចំណុចទាំងអស់ផ្សេងៗទៀត—ប្រសិនបើលោកអ្នកយល់អំពីព្រះយេស៊ូវ នោះលោកអ្នកក៏នឹងអាចយល់ផ្នែកផ្សេងៗទៀតបានយ៉ាងល្អផងដែរ—ដូច្នេះ លោកអ្នកត្រូវតែស្គាល់ព្រះអង្គសិន។ មាន៤កណ្ឌនៅក្នុងការចាប់ផ្ដើមព្រះគម្ពីរសញ្ញាថ្មី ដែលរៀបរាប់អំពីព័ន្ធកិច្ចរបស់ទ្រង់ និងរៀបរាប់អំពីព្រះជន្មរបស់ទ្រង់ ទោះបីគ្មានកណ្ឌណាបានរៀបរាប់រាល់ឆ្នាំនៃព្រះជន្មរបស់ទ្រង់ក៏ដោយ ដោយសារអ្វីដែលព្រះអង្គបានធ្វើនៅក្នុងអំឡុងបីឆ្នាំចុងក្រោយរបស់ទ្រង់គឺសុទ្ធតែសំខាន់។ នេះហើយជាមូលហេតុដែលអ្នកនិពន្ធបានផ្ដោតលើបីឆ្នាំនោះ។