របៀបធ្វើឲ្យពេលវេលាអធិស្ឋានដែលស្លាប់ មានជីវិតឡើងវិញ

តើរបៀបណាដែលយើងអាចត្រឡប់មករកជីវិតនៃការអធិស្ឋានដែលរស់រវើក នៅក្នុងពេលវេលានៃជីវិតដ៏សែនមមាញឹក? តើមានរបៀបណាដែលយើងអាចវិលត្រឡប់មកភ្ជាប់ទំនាក់ទំនងជាមួយព្រះយ៉ាងពិតប្រាកដបាន?

៤ មិថុនា ២០២៤អានរយៈពេល ៨ នាទី

មើល២០៨ដង

ខ្ញុំចង់ចែករំលែកជាមួយលោកអ្នកនៃការអនុវត្តជាក់ស្ដែងចំនួនដប់ ដើម្បីជំរុញពេលវេលានៃការអធិស្ឋានរបស់លោកអ្នក។ ប្រសិនបើយើងនិយាយដោយស្មោះត្រង់ នោះយើងភាគច្រើននឹងទទួលស្គាល់ថាជីវិតនៃការអធិស្ឋានទៀងទាត់ គឺពិតជាពិបាកណាស់ក្នុងការទ្រាំទ្រ។ ប៉ុន្តែវាពិតជាមិនត្រូវការបែបនោះទេ ដោយព្រោះការអធិស្ឋាន គឺពិតជាផ្នែកដ៏សំខាន់មួយនៃការដើរក្នុងសេចក្តីជំនឿរបស់យើង។

ការសញ្ជឹងគិតអំពីភាពអស្ចារ្យរបស់ព្រះ
ខ្ញុំជឿជាក់ថា គ្រប់ការសម្រេចចិត្តទាំងអស់ក្នុងជីវិតរបស់យើងត្រូវបានចងភ្ជាប់នឹងការយល់ដឹងរបស់យើងអំពីព្រះ និងព្រះបន្ទូលរបស់ទ្រង់។ នោះគឺថា ប្រសិនបើយើងមានទស្សនៈត្រឹមត្រូវអំពីព្រះអង្គសង្គ្រោះ និងព្រះបន្ទូលដ៏គ្រប់គ្រាន់របស់ទ្រង់ នោះវានឹងជំរុញយើងយ៉ាងត្រឹមត្រូវក្នុងគ្រប់ជម្រើសនៃជីវិត។ នេះគឺជាការពិតជាពិសេសនៅពេលនិយាយអំពីការអធិស្ឋាន។ ទស្សនៈដ៏ទូលំទូលាយអំពីព្រះ ដែលទទួលបានដោយការសញ្ជឹងគិតលើព្រះបន្ទូលរបស់ទ្រង់ គួរតែជំរុញអ្នកជឿឲ្យចំណាយពេលកាន់តែច្រើនជាមួយទ្រង់។ យើងត្រូវតែដូចជាស្ដេច ដាវីឌ ដែលអាទិភាពខាងឯវិញ្ញាណគឺ «មើលសេចក្ដីលំអនៃព្រះយេហូវ៉ា» ហើយទទួលបានកម្លាំងសម្រាប់ប្រឈមឧបសគ្គក្នុងជីវិត (ទំនុកតម្កើង ២៧:៤)។

បង្កើនចំណេះដឹងរបស់អ្នកអំពីការអធិស្ឋាន
អានសៀវភៅ និងស្តាប់ការអធិប្បាយអំពីការអធិស្ឋាន។ អនុញ្ញាតឲ្យពេលវេលានៃការសិក្សាផ្ដោតអារម្មណ៍របស់លោកអ្នក ជួយលោកអ្នកឲ្យអធិស្ឋានកាន់តែមានប្រសិទ្ធភាព។ ទោះបីជាតាមរយៈវិធីសាស្ត្របុរាណដូចជា វិធីសាស្ត្រនៃការអធិស្ឋានរបស់លោក ហិនរី (Henry's The Method of Prayer) ឬការព្យាបាលបែបទំនើបដូចជា ការអធិស្ឋាននាំឲ្យមានការផ្លាស់ប្ដូររបស់លោក ហិនឌើសុន (Henderson's Transforming Prayer) សូមប្ដេជ្ញាចិត្តខ្លួន ដើម្បីបង្កើនចំណេះដឹងរបស់អ្នកហើយអធិស្ឋានថាចំណេះដឹងនោះនឹងផ្លាស់ប្ដូរទៅជាការប្ដេជ្ញាចិត្ត។

អភិវឌ្ឍចិត្តទន់ភ្លន់ដោយការអធិស្ឋានតាមរយៈព័ត៌មានដ៏សោកសៅ
អ្នកអាចធ្វើដូចនេះពេញមួយថ្ងៃរបស់អ្នក នៅពេលអ្នកជួបប្រទះរឿងដូចជា ទទួលបានការជូនដំណឹងអំពីអាសន្ន ឃើញគ្រោះថ្នាក់ចរាចរណ៍ ឬអានអំពីព្រឹត្តិការណ៍បច្ចុប្បន្ន។ ជារឿយៗមនុស្សត្អូញត្អែរថាវាពិតជាពិបាកក្នុងការផ្ដោតអារម្មណ៍អំឡុងពេលអធិស្ឋាន។ នេះជាវិធីអនុវត្តជាក់ស្ដែងមួយ ដើម្បីផ្ដោត និងអភិវឌ្ឍចិត្តមេត្តាចំពោះអ្នកដែលមានតម្រូវការ។

ស្វែងរកកន្លែងស្ងប់ស្ងាត់
មានកន្លែងមួយដែលអ្នកអាចទៅស្ងាត់ស្ងៀមនៅចំពោះព្រះអម្ចាស់។ ព្រះយេស៊ូវតែងតែយាងទៅឯភ្នំឲ្យឆ្ងាយពីហ្វូងមនុស្ស ដើម្បីអធិស្ឋាន។ ជាញឹកញាប់ខ្ញុំដកថយទៅទីធ្លាខាងក្រោយផ្ទះរបស់ខ្ញុំដោយប្រើកាសបិទសំឡេងរំខានរបស់ខ្ញុំ ដើម្បីស្វែងរកកន្លែងស្ងប់ស្ងាត់ ដើម្បីភ្ជាប់ទំនាក់ទំនងជាមួយព្រះក្នុងការអធិស្ឋាន។

មានពេលសម្រាប់ការអធិស្ឋានដែលគួរតែមានសណ្ដាប់ធ្នាប់—ពេលដែលលោកអ្នកមានការប្រឈមមុខនឹងតម្រូវការរបស់មនុស្សនៅចំពោះមុខលោកអ្នក និងដោយមានវិធីសាស្ត្រក្នុងការអធិស្ឋានតាមរយៈតម្រូវការទាំងនោះ។ ខ្ញុំផ្ទាល់ខ្លួន ខ្ញុំប្រើកម្មវិធី ដើម្បីជួយខ្ញុំតាមដាននូវអ្វីដែលខ្ញុំចង់អធិស្ឋាន។ ខ្ញុំបានឈប់ធ្វើកំណត់ហេតុលើសំណើអធិស្ឋាន ដោយសារខ្ញុំចង់មានសិទ្ធិចូលទៅកែសម្រួល និងធ្វើបច្ចុប្បន្នភាពយ៉ាងងាយស្រួល។ ហើយខ្ញុំភ័យខ្លាចចំពោះការបាត់បង់សៀវភៅកំណត់ហេតុនោះ។